كيمياء العلاقات

وصف الكتاب

أنا د. جيرمين.. يمكن لما بدأت اكتب الكتاب ده، مكنتش ناوية اكتب "كتاب" بالمعنى التقليدي، كنت بكتب لنفسي في البداية، كنت بفتش في وجعي، في محاولاتي أفهم نفسي والناس، وفي كل المرات اللي حبيت فيها غلط أو اتصرفت بحسن نية ووجعت نفسي كنت بدور على "العلاقات"، والكيمياء التي تحكمها، وافتكرت زمان إن السر إننا نفهم اللي قدامنا. لحد ما اكتشفت إن أول علاقة محتاجة شفاء هي علاقتنا بنفسنا كل فصل هنا هو حكاية من الواقع، من جلسة، أو موقف، أو لحظة وعي غيرت نظرتي، مش بكلمك من برج عالي، أنا زيك بالظبط، عندي لحظات ضعف، وخوف، وتمسك، وأوقات بفقد فيها إيماني بالناس، لكن كل مرة كنت برجع أفتكر إن "الوعي مش بيعصمنا من الوجع، لكنه بيفهمنا معناه" وكتبت الكتاب ده عشان أقولك إنك مش لوحدك، وإن كل وجع مريت بيه ليه معنى، وإنك تقدر تبدأ من جديد في أي لحظة هتلاقي هنا مواقف هتلمسك، يمكن تفكرك بنفسك، ويمكن تفكرك بحد كنت بتحبه هتضحك، وتتأمل، وتبكي يمكن، بس الأكيد إنك هتشوف جزء منك بين السطور أنا مؤمنة إن العلاقات مش مجرد حكايات حب أو ألم، لكنها مرايات بتورينا جوانا إيه محتاج شفاء وإني لما بتعلم أحب بوعي، وأتقبل نفسي، واغفر، مش بس بعيش بسلام.. لكن كأني بولد من جديد فلو وصلت لحد هنا، شكرًا إنك سمحتلي أكون جزء من رحلتك وياريت وإنت بتقرأ، متستعجلش.. خد وقتك، إقرأ بجمالك، بحضورك، بحسك، لأنك تستحق تفهم وتعيش كلل كلمة بعمقها وخليني أقولها ببساطة... ده مش كتاب عن العلاقات، ده كتاب عنك بكل الوعي والحب.